partî dai agns otante dal 1900, la sene de musiche alternative e rivà al massim di popolaritât tai Paîs de zone plui a nord dal mâr Adriatic. Grups musicâi de Jugoslavie come i Laibach, i Borghesia e i Kud Idijoti si son fat cognossi ancje fûr de sene locâl.
Te zone di confin a nasserin circui di avanvuardie, come CRMK a Šempeter pri Gorici e Strelišče a Dobrovo. Chescj puescj a tiravin dongje zovins talians che a passavin il confin tant che a vevin la patent e il passepuart. Compagn, i zovins slovens a viazavin in Italie par frecuentâ concierts e spetacui e, in zonis dulà che al jere pussibil, si sintonizavin su Radio Onde Furlane di Udin, cognossude pe sô sensibilitât musicâl contemporanie. Concierts memorabii dal periodi a son testemonis di chestis interazions transnazionâls, come il conciert dai Borghesia te Cjase de Zoventût di Buie, ai 21 di Mai dal 1988, e il conciert dai Laibach tal auditorium Zanon di Udin, ai 28 di Març dal 1991.
Cualchi conession personâl stabilide in chei agns e je ancjemò ative in dì di vuê. Par esempli, la etichete indipendente Finalmuzik di Udin e continue a produsi oparis dai Borghesia e di altris grups slovens popolârs tai agns otante dal 1900.
Il grup electropunk Borghesia al jere un messedot di influencis transnazionâls. Fondât a Lubiane di Aldo Ivančić e Dario Seraval, ducj i doi di Pula, il lôr prin album (te figure) al fo coprodusût di un coleghe de leiendarie cjase discografiche Attack Punk di Bologne, che e veve discuviert i CCCP.
Manifest di un event musicâl al Strelišče tal 1992, cuntune mape rudimentâl che e mostrave cemût rivâ tal lûc partint di Gurize. Insiemi cul CRMK a Šempeter pri Gorici, il Strelišče al jere un puest impuartant pai concierts punk che a tiravin dongje un public misturât di slovens e talians.
A la fin dai agns otante dal 1900, il CSS - Teatri Stabil di Inovazion dal Friûl – Vignesie Julie al à decidût di fâ un progjet di musiche e art pai zovins. Chest al à puartât a la organizazion di tancj concierts che a son restâts leiendaris: tal 1990 i grups Demolition Group de Slovenie e Disciplina Kičme de Serbie a àn sunat a Udin, compagnâts de proiezion dal documentari sui Laibach "Victory under the Sun".
