is monts a son stadis dispès rapresentadis tant che confins statâi naturâi e a son stadis il teren di confront jenfri lis pratichis di alpinisim che si sfidavin, par l’obietîf di plantâ lis bandieris nazionâls. Tal stes timp, l’alpinisim al à puartât dongje personis di paîs diferents - lis organizazions internazionâls di alpinisim a son stadis fondadis tai agns jenfri lis dôs vueris - ancje se l’alpinisim stes al è stât une vore ostacolât in timps di conflit. Daspò la vuere i confins di mont e jerin vuardiâts cun durece. Tai agns sessante dal 1900, ancje par vie dal interès pal disvilup turistic, lis tradizions di une “amicizie alpinistiche” che e passàs i confins nazionâi a scomençarin a jessi recuperadis dai rapresentants dai circui alpins dal Friûl – Vignesie Julie, de Slovenie e de Carintie. Si tacà a organizâ lis conferencis anuâls des Alps Juliis tal 1965.
Ancje se a jerin tantis dificoltâts e incomprensions, a colaborarin par rivâ a acuardis di reciprocitât pai ripârs di mont (tratât preferenziâl pai membris dal club tai ripârs di altris paîs), par fâ in mût che i confins des monts a sedin plui permeabii e par protezi l’ambient comun. Tantis iniziativis a son stadis fatis par sburtâ i alpiniscj e i trekker a esplorâ lis monts di là dai confins. Planc planc, la stesse percezion des cimis si é trasformade: no vignint plui consideradis dome come bariduris difensivis, ma ancje come lûcs di scambi e di incuintri.
Lis relazions personâls jenfri i alpiniscj a jerin fondamentâls par promovi la cooperazion. Cheste letare e je stade mandade di un diretôr dal Club alpin talian di Gurize a un coleghe dal Planinska Zveza Slovenije tal 1967. Il test al evidenzie i valôrs de amicizie transnazionâl jenfri i alpiniscj.
Dal 1980, ogni an si organize la Fieste de Amicizie te mont Fôr (Forno/Pec/Dreilandereck). Une fieste che e puarte dongje miârs di partecipants tal pont di contat jenfri Italie, Jugoslavie (vuê Slovenie) e Austrie. La iniziative e continue ancjemò vuê.
Lançade tal 1972, la iniziative Cime de amicizie e promôf rimpinadis su lis 30 spicis plui impuartantis dal Friûl – Vignesie Julie, de Slovenie e de Carintie. La iniziative e à vût un grant sucès. Fin tal 1990, a son stâts dâts fûr plui di 10.000 opuscui trilengâi tai trê Paîs.
