is visions che si son afermadis a rivuart de vuere frede europeane a metin tal centri dal dibatiment la impermeabilitât dai confins jenfri Est e Ovest. Il mûr di Berlin al è viodût come un pont di riferiment simbolic e di fat ator di chel si costruìs la retoriche rispiet a cheste division impenetrabil. Il cûr de mostre, però, al è di une altre bande, ven a stâi la porositât dai confins interstatâi formâts dal sisteme dai blocs. Ancje se no si pues dineâ la impuartance dal mûr di Berlin in timp de vuere frede, se o passìn di Berlin al spazi jenfri lis Alps e l’Adriatic, o podìn ancje zontâ une prospetive diferente sul passât european. Chest nol vûl dî che no fossin tensions te zone. La prime e, soredut, la seconde vuere mondiâl a lassarin olmis indelebilis su lis vitis des personis che si superarin cun tante dificoltât. Dut câs, tal deceni dopo de vuere, i oms di stât a scomençarin planc planc a ricognossi i efiets benefics des buinis relazions di vicinance a nivel politic e economic, cussì come culturâl e sociâl. A man a man une metodiche divierse e cjapà pît tai confins jenfri la Jugoslavie, l’Austrie e l’Italie - la bande meridionâl di chê che Winston Churchill al clamà la Cortine di fier tal 1946. Par cheste reson tal 1961, intant che si faseve sù un mûr di ciment jenfri Berlin ocidentâl e orientâl, di chê altre bande de Europe il produtôr cinematografic sloven Mako Sajko al si domandà cun reson Dulà che e je la Cortine di Fier? tal so cine documentari.
Cheste prospetive storiografiche plui vaste no rivuarde dome un cambiament di vision viers Sud, ma ancje une prospetive divierse. Insiemi cul rûl dai oms impuartants (plui di râr des feminis) e des istituzions statâls, e ten cont ancje dal aspiet de vite di ogni dì. E mostre il rûl de int comun tal judâ a integrâ a man a man la zone di confin: passâ il confin al pues jessi un fat cuotidian. Il confin al jere sigûr presint e si podeve sintî in tantis manieris, ma invezit di jessi un ostacul insuperabil, par tancj al jere dome une realtât fastidiose ma che e permeteve di fâ tantis pratichis transnazionâls, dal comprâ aliments e eletrodomestics al lâ a gustâ di domenie e in vacance d'istât.
Cheste mostre e mostre lis personis, i lûcs e lis pratichis transnazionâls di ogni dì che a nus disin che la storie de Europe e somee diferente se o passìn dal mûr di Berlin al spazi jenfri lis Alps e l’Adriatic.
